Sjávarauðlindaskólinn

Eins og undanfarin ár buðum við hjá Fisktækniskólanum ásamt Vinnuskóla Grindavíkurbæjar og Codland nemendum 9. bekkjar upp á sumarnámskeið sem við nefnum Sjávarauðlindaskólinn. Sjávarauðlindaskólinn var dagsettur 19.-22. júní í og var hann með hefðbundnu sniði en markmiðið með starfinu er að veita ungmennum innsýn í fjölbreyttan sjávarútveg og opna augu þeirra fyrir áhugverðum tækifærum tengdum sjávarútvegi í sinni heimabyggð. Áhersla er lögð á að kynna fullvinnslu aukaafurða úr sjávarfang og mikilvægi sjávarútvegsins fyrir land og þjóð ásamt því að kynna fyrir þeim þau fjölmörgu afleiddu störf sem fylgja sjávarútvegnum. Að sjálfsögðu er sögu Grindavíkur gerð skil en saga bæjarins er samofin sögu sjávarútvegs og fiskvinnslu. Skólinn er styrktur af fyrirtækjum hér í bæ sem víðar sem tengjast bláa hagkerfinu á einn eða annan hátt.

Þessa daga heimsóttum við einnig höfuðborgina eins og undanfarin ár, kíktum í Sjávarklasann sem er samfélag yfir 60 fyrirtækja og frumkvöðla í hafsækinni starfsemi. Þar eru fyrirtæki í fiskeldi, fisksölu, sjávarútvegstækni, hugbúnaði, hönnun, líftækni, snyrtivörum og ýmsu öðru. Hús sjávarklasans er samfélag þessara fyrirtækja og vettvangur fyrir þau að skapa saman ný verðmæti.

Eftir þessa góðu heimsókn héldum í Sjóminjasafnið sem stendur skammt frá Sjávarklasanum en hlutverk þess er að safna og miðla sögu og minjum tengdum sjó og sjómennsku. Eftir hádegi var haldið í Sæbjörgina sem er skólaskip SlysavarnafélagsinsLandsbjargar. Þar tók á móti okkur Bogi Þorsteinsson aðstoðarskólastjóri og kynnti hann sögu félagsins fyrir nemendum sem og allt það stórkostlega starf sem á sér stað í öryggismálum sjófarenda og hvernig slysum og dauðsföllum á sjó hefur fækkað gífurlega á undanförnum áratugum. Afskaplega fræðandi og skemmtileg heimsókn.

Eftir þessa heimsókn var haldið í Valdísi ísbúð þar sem mannskapnum var boðið upp á ís í blíðunni. Síðan var haldið heim á leið til Grindavíkur og allir sáttir og glaðir með daginn.

Við heimsóttum Fiskmarkað Suðurnesja hér í Grindavík þar sem Birkir Hrafn tók á móti okkur. Það fengu nemendur að skoða fiska og eins sýndi umsjónarmaður þeim hvernig á að slægja, hausa og handfletja þorsk. Einnig flakaði og roðdró hann karfa og langlúru ásamt því að kryfja og kanna innyfli úr þorskinum.

Eftir þessa fínu heimsókn fórum í stjórnstöð Björgunarsveitarinnar Þorbjarnar þar sem á móti okkur tóku þau Guðni, Ásdís Marín og Harpa. Þau kynntu starfsemi sveitarinnar, fóru yfir sögu hennar og sýndu nemendum húsakynnin og þann tækjabúnað sem hún býr yfir. Að því loknu klæddi hluti nemenda sig í flotgalla og eftir sýnikennslu hjá Guðna og félögum hvernig bera ætti sig að stukku nemendur í sjóinn og höfðu mikla skemmtun af. Ekki skemmdi fyrir að veðrið var gott á meðan á þessu stóð sem gerði upplifunina einstaka. Sannarlega skemmtileg og fræðandi heimsókn til einnar farsælustu björgunarsveitar landsins sem við Grindvíkingar erum afar stoltir af.

Hópurinn fékk heimsókn frá Davíð Tómasi hjá Codland sem hélt stuttan fyrirlestur um starfsemi Codlands og þeirrar vöru sem þeir eru að þróa og framleiða. Gríðarlega spennandi hlutir að gerast hjá þeim og framleiðsla á hágæða kollageni að komast á fullt í nýrri verksmiðju þeirra hér í Grindavík. Eftir þennan góða fyrirlestur hélt hópurinn í HsOrku í Eldborgu þar sem á móti okkur tók Jóhann Snorri forstöðumaður viðskiptaþróunar. Fyrirlestur hans fólst í því að segja nemendum frá sögu fyrirtækisins, þróunar þess og framgangs en fyrirtækið er okkur Suðurnesjabúum gríðarlega mikils virði enda sér það okkur fyrir rafmagni og bæði heitu og köldu vatni.

Að þessari heimsókn lokinni lá leið okkar í rannsóknarmiðstöð Bláa lónsins þar sem meistari Jóhannes leiddi nemendur í gegnum leyndardóma lónsins og þeirra afurða sem fyrirtækið hefur þróað og markaðssett.

Þetta árið breyttum við aðeins út af dagskránni þar sem við höfðum rúman tíma og heimsóttum fiskeldisstöð Samherja sem staðsett er að Stað í Staðarhverfi. Þar tóku á móti okkur þær Bylgja of Arna en hún er fyrrum nemenadi í sumarskólanum okkar. Þær leiðsögðu hópnum um svæðið og kynntu starfsemina og vinnuna sem þarna fer fram og her óhætt að segja að nemendur höfðu bæði mikið gagn og gaman af þessari heimsókn. Skemmtileg nýbreytni og gaman að heimsækja svona fyrirtæki í starfsgrein sem er í gífurlegum vexti hér á Suðurnesjumsem víðar.

Eins og undanfarin ár þá var það síðasta sem hópurinn gerði var að heimsækja Þekkingarsetrið í Sandgerði þar sem þau skoðuðu lífríkissýninguna og sýninguna Heimskautin heilla sem fjallar um heimsskauta og hafrannsóknaskipið Pourqoui Pas. Þeir Sölvi og Daníel starfsmenn Þekkingarsetursins fræddu síðan mannskapinn um þær rannsóknir sem fram fara í setrinu á lífríkinu í hafinu og umhverfi þess hringinn í kringum Íslands. Þarna fer fram gott og gagnlegt rannsóknarstarf sem mjög gaman er að skoða og fræðast um og höfðu nemendur okkar gagn af henni eins og reyndar öllu því sem boðið er upp á í þessum árlega sumarskóla okkar.

Það er óhætt að segja að allir nemendur hafi farið heim margs vísari um sögu Grindavíkur og sjávarútveginn sem hornsteins alls atvinnulífs hér Suðurnesjum sem og annarstaðar. Að dómi okkar sem höfum með þennan skóla að gera er þessi sumarskóli reikilega búinn að sanna tilverurétt sinn og nægir að benda á mjög mikla ánægju þeirra nemenda sem hann hafa sótt allt frá upphafi. Allt gekk eins og í sögu og er vert að þakka öllum sem að verkefninu komu kærlega fyrir þátttökuna og sérstaklega nemendunum sem sýndu af sér einstaklega góðan þokka og voru sjálfum sér og skólanum til mikil sóma